August 2010 September 2010 October 2010
Mo Tu We Th Fr Sa Su
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30

IITV

Banner

Media

NUEVO vídeo de II-SP Galiza Internacionalista aragones galego català castellano asturianu euskara
Manifèst en occitan PDF Print E-mail

Manifèst en aranés (occitan)

Assistim ara major crisi deth capitalisme des darrèri ueitanta ans, e un aute còp es govèrns dera Union Europèa vòlen que ne paguen es conseqüéncies es trabalhadors e es sectors populars. En tota Euròpa, es licenciaments, es expedients de regulacion d’aucupacion e eth non renauiment de contractes se convertissen jornalièrament en drama de milions de persones condemnades ath caumatge, eth desnonament e era misèria.

Es govèrns europèus espòlien eth tresaur public entà rescatar es banquièrs e ajudar es granes enterpreses, mentre era desocupacion creish sense arrés que l'arture. Qu'ei era Euròpa des privatizacions, deth Plan Bolonha entà mercantilizar es estudis superiors, dera Directiva Bolkenstein o dera Directiva deth Retorn contra es trabalhadors immigrants, qu'encoratge era xenofòbia e eth racisme.

Era crisi actuau, coma non podie èster de cap auta manèra, ath delà des sues conseqüéncies economiques e sociaus, da lòc a importantes transformacions politiques, que se veiràn intensificades en un lèu futur.

En cas der Estat espanhol, era crisi, era globau e era pròpria, contribuïssen a deishar definitiuament en descorbit es mancances deth Govèrn de Rodríguez Zapatero e deth regim borbonic sorgit deth nomentat procès de “transicion”: corrupcion generalisada, usatge dera repression legau o illegau coma forma recurrenta d’afrontar es conflictes sociaus e politics damb es sectors populars, precarietat des servicis sociaus, escrancament des sistèmes educatius…

Mès que mès, afloren es força grèus mancances democratiques d’un regim qu'a un Cap d’Estat, Juan Carlos I, que siguec imposat per Franco, un regim que, d’acòrd damb aguesta situacion aberranta, non arribe pas a elaborar ua lei dera memòria istorica qu'arreconeishe era realitat dera resisténcia antifeishista des nòsti pòbles.

Existís un corrent involucionista, neofeishista, impulsat per sectors poderosi deth capitalisme espanhòu e eth sòn hilat institucionau e mediatic, qu'a dues fàcies: era “modèrna”, qu'a coma expression mès significativa qera UpyD, e era "tradicionau", qu'a coma punta de lança era Conferéncia Episcopau Espanhòla. Aguest corrent involucionista,
damb es sues diuèrses expressions, ei çò qu'en aguest moment oriente era estrategia de hons deth blòc dominant espanhòu, includit eth Govèrn der Estat. Ua estrategia que se materialize, entre d'autes causes, ena aliança PP-PSOE entà arténher eth govèrn dera Comunitat Autonòma Basca damb un objectiu clar: era espanholizacion d’aguest territòri.

En un aute costat be i èm es fòrces sobiranistes e independentistes de quèrra, es fòrces politiques dera quèrra estatau respectuoses damb es drets nacionaus des diuèrsi pòbles oprimidi per Estat espanhòu, atau coma importants movements sociaus e sindicaus, que destaquen entre eth movement antifeishista; eth movement contra era privatizacion dera sanitat, era educacion e es servicis publics; es lutes obrères contra es EROs e licenciaments; era luta des estudiants contra eth Plan Bolonha; es movements de hemnes… Ath sòn torn, bèri d’aguesti movements sociaus an ua importanta articulacion nacionau-populara, mès que mès enes pòbles a on eth procès politic sobiranista ei mès auançat.

Consideram que i a pro capacitat entà orientar en un sens anticapitalista e democratic aguest desir cada còp mes estenut de cambiament radicau, maugrat qu'ara ora d'ara aguesta capacitat age un desvolopament desigual enes nòstes respectives nacions.

En tot partir d’aguesta avaloracion, impulsam aguest manifèst, damb es següents èishi basics:

* Justícia sociau. Era crisi que la paguen es que l’an provocada: es capitalistes. Eth capitalisme espanhòu a uns trèti mès que mès agressius, coma era terribla precarietat laborau, causa dera major taxa de caumatge e d’aucupacion eventuau dera UE. E ara era pretension deth sistèma ei hèr un pas mès entara explotacion e es retalhades sociaus. Era gent qu'apiejam aguest manifèst mos comprometem a impulsar era mobilizacion entà frenar aguestes intencions, en tot exigir un plan de rescat des trabalhadors, sense temor a prepausar entad açò mesures anticapitalistes.

* Libertats democratiques plees. Verificam com, pas a pas, se retalhen es ja de per se limitadi drets civius existents, coma eth dret ara non discriminacion per arrasons ideologiques, de lengua e cultura, d’edat o de genre. Eth dret ara liura expression, eth dret a non èster represalhat, torturat o tractat pes pròpries idèes. Eth dret a votar e èster votat. Er Estat espanhòu non respècte era sobeiranetat des diuèrses nacions jos era sua jurisdiccion en conjunt des pòbles. I a un hilat juridic-politic creat ena transicion qu'a convertit er Estat en ua preson de pòbles e de gent, atau coma en un potz de corrupcion.

* Non a era discriminacion de genre. Non sonque coma enonciat formau e uet de contengut, mès coma ua exigéncia normatiua, juridica e practica que hèsque reaument possible era fin dera discriminacion. Qu'includís, entre autes causes, eth dret e era possibilitat reau de contraròtle des hemnes sus eth sòn còrs, era sua sexualitat e era sua capacitat reproductiva.

* Drets politics. Reivindicam es drets negadi peth regim actuau, a on cau destacar eth dret de toti es pòbles a decidir de forma sobirana eth sòn futur, e non coma un hèt isolat mès coma un dret permanent, ei a díder eth dret d’autodeterminacion. Eth dret de cada pòble a decidir era sua forma de govèrn e ara normalizacion dera sua lengua e era sua cultura nacionau.

* Contra era Euròpa deth capitau. Qu'èm eth contra dera Euròpa deth capitau e en favor dera Euròpa des pòbles. Èm eth contra dera OTAN coma expression militara der imperialisme e, donques, exigim era retirada der Estat espanhòu dera mencionada aliança militara. Èm en contra dera especulacion e deth deteriorament deth miei ambient. Èm entara defensa dera sobeiranetat alimentària e de çò qu'ei collectiu deuant çò qu'ei privat.

Apiejam es procèssi sobiranistes que se dan en encastre europèu, e atau madeish exprimim era nòsta solidaritat damb es procèssi d’articulacion patriotics, antiimperialistes e de justícia sociau que se debanen ena America Latina, atau coma damb es fronts de resisténcia en Orient Mejan, e mès que mès damb era eroïca luta deth pòble Palestinian. Dempús d’ua ferventa vocacion internacionalista, apiejam es lutes de toti es pòbles deth mon entara sua libertat e era sua dignitat.

Comission promotora dera candidatura en Parlament Europèu “Iniciatiua Internacionalista“
15 d’abriu de 2009